Handbók um skapandi ferli eftir Eirúnu Sigurðardóttur komin út

Eirún Sigurðardóttir myndlistarkona og einn þriggja meðlima Gjörningaklúbbsins gaf nýverið út handbókina Skapandi ferli, leiðarvísir og kynnir hún þar til sögunnar aðferðarfræði sem hægt er að nýta sér í skapandi ferli. Okkur langaði að vita meira um framtakið og spurðum Eirúnu nokkurra spurninga.

Hvernig kom það til að þú réðist í að gera þessa bók?

Mér fannst það mikilvægt til þess að styrkja orðræðu og þekkingu á skapandiferli. Ég var búin að kenna sama námskeiðið í LHÍ í mörg skipti og 5 síðustu með Huginn Þór Arasyni myndlistarmanni, við vorum búin að þróa kennsluaðferðirnar okkar mjög mikið og safna í góðan reynslubanka. Ég vildi halda utan um þessa þekkingu og gefa fleirum tækifæri á að nýta sér hana.

Er leiðarvísirinn eingöngu hugsaður fyrir listamenn eða geta fleiri nýtt sér hann?

Leiðarvísirinn er fyrir alla sem vilja leggja upp í óvissuferð skapandi ferlis og einnig fyrir kennara sem leiðbeina hópi í gegnum slíkt ferðalag. Leiðarvísirinn er litaður af mínu sjónarhorni og þeim þekkingarbrunni sem það kemur úr en það hafa allir not af því að fá sér sopa.

Hvernig þróuðust þær aðferðir sem þú kynnir hér til sögunnar?

Þær þróuðust með tíma, reynslu, samvinnu og þekkingu. Þessar aðferðir sem ég kynni byggja á  20 ára reynslu af því að vinna að myndlist og á mörkum listgreina bæði ein og sem hluti af Gjörningaklúbbnum og einsog áður segir með því að þróa sama námskeið í nokkur skipti í skapandi ferli ásamt kollega mínum.

Þessar 4 vörður sem leiðarvísirinn byggir á fóru smám saman að myndast eftir því sem að við fórum að gera okkur betur grein fyrir því hvar erfiðleikarnir höfðu tilhneygingu til þess að liggja í ferlinu hjá nemendum okkar. Í framhaldi af því fundum við svo leiðir til þess að þjálfa og efla sköpunarferli þeirra. Fólk verður strand á svo mismunandi stöðum í ferlinu og því er mikilvægt að hver og einn átti sig á eigin sköpunarferli og verkjum ef því er að skipta svo að auðveldara sé að díla við þá.

Sköpunarferli listafólks geta verið mjög ólík en þessar 4 vörður: kveikjur, hugmyndavinna, skissur í efni og úrvinnsla, eiga það sameiginlegt að verða á flestra leið. Stundum vill fólk t.d. festast á hugmyndastiginu og á erftitt með að koma sér á næsta stig þ.e. að prófa og gera tilraunir og þá er gott að geta bent í áttina að næstu vörðu sem leggur áherslu á að prófa hlutina, skissur í efni. Aðal áherslan í skapandi ferli er að treysta á neistan/eigin áhuga/tilfinningu/innsæi og leifa því svo að þróast áfram á opinn hátt og með vissum aðferðum án þess að vera með fyrirfam gefna niðurstöðu, reyna að fá sem mest út úr ferlinu þannig að það geti gefið af sér marga möguleika sem síðan er valið úr.

Eru þetta upplýsingarnar sem þú vildir hafa getað gengið að sem ungur og nýútskrifaður listamaður eða jafnvel listnemi og hverju hefði það mögulega breitt fyrir þig?

Já, ég held að það hefði gert námið mitt markvissara og undirstöðurnar sterkari og það hefði líka verið fínt að geta kíkt í svona bók þegar ég var t.d. að undirbúa kennslu í fyrsta skipti. Mitt grunnnám í M.H.Í byggði reyndar að miklu leyti á tæknikunnáttu þannig að áherslan var önnur. En nám og námsaðferðir líkt og viðhorf til skapandi ferlis eru alltaf að þróast og munu halda áfram að þróast. Þó að ég eigi erfitt með að ímynda mér það í dag þá verður þessi bók væntanlega líka barn síns tíma í framtíðinni. En ég trúi því samt að í henni sé kjarni sem falli aldrei úr gildi.

Bókina er hægt að kaupa í Mengi Óðinsgötu 2 og Flóru á Akureyri. Einnig verður hægt að panta hana í nánustu framtíð í gegnum heimasíðu Eirúnar: eirunsigurdardottir.net