REITIR – Tilraunakennd smiðja á Siglufirði
REITIR er tveggja vikna smiðja sem hefur farið fram á Siglufirði á hverju sumri síðan 2012. REITIR byggja á þeirri hugmynd að með því að stefna saman framtaksömu og öflugu fólki úr ólíkum starfsgreinum, nýtist fjölbreytt reynsla þeirra sem grunnur að áhrifaríku samstarfi. Margir þátttakendur smiðjunnar eru úr skapandi greinum, þó inná milli megi finna stærðfræðinga, forritara, mannfræðinga og ýmsa aðra. Það er mikilvægt að hafa sem mesta breidd innan hópsins, en hver þátttakandi er vandlega valinn úr fjölda alþjóðlegra umsækjenda.
–
REITIR er staðbundin smiðja sem dregur bæjarfélagið inní starfið á marga vegu. Smiðjan er í samstarfi við Fjallabyggð, ýmsa sjóði, fyrirtæki og Alþýðuhúsið á Siglufirði sem skaffar smiðjunni húsnæði og aðstoð við framkvæmd. Þátttakendur er hvattir til að vinna með bæjarbúum, vera sýnilegir og nýta þau tækifæri sem bærinn býður uppá. Þau mæta á staðinn án fyrirfram mótaðra hugmynda en með opinn hug gagnvart óeigingjörnu samstarfi og drifkraft til að skapa. Það fer mikið fyrir smiðjunni á hverju sumri en áhersla er lögð á enduruppgötvun og nýnæmi í not á almenningsrýminu. Verkefnin sem hafa verið unnin á REITUM síðastliðin fimm ár eru mjög fjölbreytt, en þátttakendur hafa t.a.m. opnað tímabundið kaffihús á ruslahaugunum, miðlað sögum heimafólks í gegnum sérhannað snjallsímaforrit, haldið hundasýningu, unnið tímabundið í bakaríinu, framkvæmt gjörninga um allan bæ, tekið yfir gamlar verksmiðjur, gefið út ýmis smárit, haldið úti metnaðarfullri útvarpsdagskrá og margt fleira.
Myndbandagerð er gegnumgangandi tilrauna og listform á meðan á smiðjunni stendur.
Smiðjan skiptist í tvo hluta: fyrri hluti REITA er tileinkaður rannsókna- og hugmyndavinnu, en seinni hlutinn úrvinnslu og framkvæmd verka. Fyrstu fjórir dagar smiðjunnar fara í að kynna þátttakendum fyrir Siglufirði á skilvirkan þátt. Verkefnastjórar Reita sjá um þessa hnitmiðuðu kynningu á bænum, m.a. með opnum viðburðum, leiðsögnum um bæinn og matarboðum hjá heimafólki. Þátttakendur hafa svo um tíu daga til að vinna og framkvæma verkefni, innblásin af Siglufirði á einn eða annan hátt.
–
Reitir vinna að gegnumgangandi endurskoðun Siglufjarðar þar sem þátttakendur beita sérkunnáttu sinni í samstarfi við aðra til að móta nýja nálgun á mynd bæjarins. Reitir eru verkfæri sem má beita á bæinn til að skoða möguleika, prófa lausnir og gera tilraunir án langtímaskuldbindinga, þar sem flest verkefnin eru tímabundin. Smiðjan veitir bæjarbúum nýja sýn og gefur þátttakendum tækifæri á að þróa sína eigin iðju, með áherslu á skemmtilegt, skapandi og sýnilegt samstarf. Reitir eru grunnur að skapandi alþjóðasamstarfi í þágu Siglufjarðar en er einnig miðpunktur í vaxandi tengslaneti sem teygir sig þvert yfir heiminn.
–
REITIR eru styrktir af Alþýðuhúsinu á Siglufirði, Uppbyggingasjóð Norðurlands Eystra, Evrópu Unga Fólksins, Erasmus+ og Fjallabyggð, auk fjölda fyrirtækja á Siglufirði.
–
Nú vinna skipuleggjendur REITA að bók um smiðjuna sem kemur út síðar á árinu og nefnist Tools for Transformation. Markmið hennar er að miðla hugmynda- og aðferðarfræði smiðjunnar og veita öðrum innblástur. REITIR fjalla um sjálfsprottið menningarstarf og frumkvæði einstaklinga, en bókin mun innihalda ýmislegt gagnlegt fyrir frumkvöðla á öllum sviðum: aðferðir við val á þátttakendum og leiðir til að tengja samfélagshópa og rannsaka nærumhverfi, mataruppskriftir fyrir stóra hópa og margt fleira.
Verið er að vinna að bók um REITI og eru myndverkin að neðan úr því verkefni. Teikningarnar eru unnar af Morgane Parma og Sophie Haack
