Í tengslum við sýninguna RÍKI – flóra, fána, fabúla verða sýndar tvær kvikmyndir um samskipti manna og dýra eftir þá Hafstein Gunnar Sigurðsson og Huldar Breiðfjörð annars vegar og Kristján Loðmfjörð hinsvegar. Kristján ræðir við gesti að sýningu lokinni.
Drottins náð, Kristján Loðmfjörð, 2015 (43 mín).
Þrettán einstaklingar deila persónulegri reynslu sinni af samvistum við dýr. Heimildarmyndin er tekin upp í sveitum landsins þar sem nánd við húsdýrin er ráðandi þáttur í daglegum störfum og lífi. Titill myndarinnar vísar til hins kristilega lögmáls um dýrin sem gjöf guðs, mönnum til ununar og afnota.
Filma, Hafsteinn Gunnar Sigurðsson og Huldar Breiðfjörð, 2012 (25 mín).
Kvikmyndin segir frá för ljósmyndara eftir suðurströnd Íslands með það fyrir augum að taka ógleymanlega mynd af vitanum í Hrollaugseyjum. Kötturinn Filma er með í för. Ætlun kvikmyndagerðarmannanna um að skrásetja hina listrænu framkvæmd tekur aðra stefnu þegar kötturinn tekur til sinna ráða.
Kvikmyndirnar verða endursýndar fimmtudagana 7. júlí, 4. ágúst og 1. september kl. 20.